माङसेबुङ/मंसिर ४ गते सम्पन्न प्रतिनिधिसभा र प्रदेशसभा सदस्य निर्वाचन २०७९ मा प्रदेश नम्बर १ बाट निर्वाचित सांसदहरूलाई किरात धर्मगुरु मुहिङगुम अङ्सीमाङ लिङ्देन आत्मानन्द सेइङ तथा मुहिङगुम अङ्सीमामाङ साँबा पवित्रहाङमा लिङ्देनहरुबाट प्रदान हुने शुभ आशीर्वाद टीका ग्रहण, शुभकामना आदान–प्रदान एव जलपान कार्यक्रमको सम्पूर्ण तयारी पूरा भएको छ ।
इलामको माङ्सेबुङ –५, गुरु निजी आश्रम लारुम्बा अवस्थित माङ्सेबुङ विकास समितिको आयोजनामा भोलि (आइतबार) हुने उक्त कार्यक्रमको सम्पूर्ण तयारी पूरा भएको आयोजक माङ्सेबुङ विकास समितिका सचिव उदयविक्रम तुम्बापोले बताए ।
कार्यक्रममा प्रदेश १ बाट निर्वाचित संघीय तथा प्रदेश सभाका सांसदहरूलाई अङ्सीमाङ तथा अङ्सीमामाङहरुबाट शुभ आशीर्वाद टीका ग्रहण एव आशीर्वचन प्रदान गर्नु हुने भएको छ ।
जलपान कार्यक्रममा १ नम्बर प्रदेशबाट प्रतिनिधिसभा तथा प्रदेशसभा सदस्य निर्वाचनमा निर्वाचित विभिन्न राजनीतिक दलका निर्वाचित सांसदहरूलाई निमन्त्रणा गरिएको आयोजक समितिले जनाएको छ ।
