
माङसेबुङ/दमक भाङबारी स्पोर्टिङ क्लब झापा आत्मानन्द गोल्ड कप २०८२ अन्तर्राष्ट्रिय फुटबल प्रतियोगिताको सेमिफाइनलमा प्रवेश गरेको छ ।
माङसेबुङ गाउँपालिका–५ स्थित आत्मानन्द रंगशालामा आज बुधबार भएको खेलमा आयोजक युथ अफ माङसेबुङलाई ४–३ गोल अन्तरले पराजित गर्दै राष्ट्रिय खेलाडी नवयुग श्रेष्ठ र देवेन्द्र तामाङको साथ रहेको दमक भाङबारीले सेमी फाइनलमा स्थान पक्का गरेको हो । योसँगै आत्मानन्द गोल्डकपको सेमिफाइनल समिकरण पूरा भएको छ ।

दमक भाङबारी झापाको जितमा आशिष लावती, निश्चल वस्नेत, विवेक पौडेल र नवयुग श्रेष्ठले गोल गरेका थिए । यता आयोजकका लागि भने नाम्साङ लावती, विवेकहाङ लिम्बू र गोली लिम्बूले गोल गरे । खेलको मेन अफ दी म्याच दमक झापाका विवेक पौडेल घोषित भए ।
खेलको चौंथो मिनेटमा आशिष लावतीको गोलमा दमक भाङबारीले सुरुवाती अग्रता बनाएको थियो । त्यसपछि खेलको नवौं मिनेटमा निश्चल वस्नेतले गोल गर्दै दमकको अग्रता दोब्बर बनाएको थियो । खेलको ३० औं मिनेटमा प्रदिप पौडेलले गोल गर्दै दमकलाई ३–० को अग्रातामा पुर्याए ।

पहिलो हाफमा ३–० ले पछि परेको आयोजक टिमले दोस्रो हाफमा भने सुधारिएको खेल पस्केका थिए । आक्रमक भएर मैदान प्रवेश गरेको आयोजकले खेलको ३९औं मिनेटमा नाम्साङ लावतीले गोल गर्दै आयोजकलाई ३–१ को अवस्थामा फर्काएका थिए । खेलको ४३ औं मिनेटमा राष्ट्रिय खेलाडी समेत रहेको नवयुग श्रेष्ठले गोल गर्दै दमकलाई ४–१ को अग्रता दिलाए ।
त्यसपछि थप आक्रमक भएको आयोजक माङसेबुङलाई खेलको ६३ औं मिनेटमा विवेकहाङ लिम्बूले गोल गर्दै ४–२ को अवस्थामा फर्काएका थिए । यस्तै खेलको ७० औं मिनेटमा गोली लिम्बूले गोल गर्दै आयोजक माङसेबुङलाई ४–३ को अवस्थामा फर्काए पनि हार भने टार्न सकेन ।

प्रतियोगिताको सेमिफाइनल खेलहरु भने शबिार र आइतबार हुनेछ । शनिबार हुने पहिलो सेमिफाइनल खेलमा सिरिजंगा स्पोर्टिङ क्लब मोरङ र दुधे यूथ क्लब झापाबीच प्रतिस्पर्धा हुनेछ । यस्तै आइतबार हुने दोस्रो सेमिफाइनल खेलमा लेटाङ फुटबल क्लब मोरङ र दमक भाङबारी स्पोर्टिङ क्लब झापाबीच प्रतिस्पर्धा हुने आयोजकले जनाएको छ ।
विश्व शान्ति र मानव एकताका निम्ति फुटबल भन्ने नाराका साथ मुहिङगुम अङसीमाङ लिङ्देन आत्मानन्द सेइङज्यूको ७२ औं जन्मोत्सव तथा मुहिङगुम अङसीमामाङ साँबा पवित्रहाङमा लिङ्देनज्यू नुमाङगेन्ना सेवा तथा चेसोक तङनाम महासमारोह २०८२ को अवसरमा आयोजित प्रतियोगिताको फाइनल खेल मंसिर १७ गते हुनेछ ।

मुहिङगुम अङसीमाङ लिङदेन आत्मानन्द सेइङज्यूको ७१ औं शुभ जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नुमाङगेन्ना सेवा एंव चेसोक तङनाम महासमारोहको आयोजना र आत्मापवित्र खेलकुद समितिको संयोजनमा आत्मानन्द गोल्डकप सञ्चालन हुने छ । भने, युथ अफ माङसेबुङले सह–संयोजनको भूमिका निर्वाह गर्ने जनाइएको छ ।
प्रतियोगिताको विजेताले ट्रफीसहित नगद ३ लाख ११ हजार १ सय ७२, मेडल र प्रमाणपत्र पाउने छन् भने उपविजेताले ट्रफीसहित नगद २ लाख ११ हजार १ सय ७२, मेडल र प्रमाणपत्र पाउने छन् ।

यस्तै सर्वाधिक गोलकर्ता, उत्कृष्ट गोल रक्षक, उत्कृष्ट खेलाडी, उत्कृष्ट डिफेण्डर, उत्कृष्ट स्ट्राइगर, उत्कृष्ट मिडफिल्डर, उदयमान खेलाडी, अनुशासित खेलाडी र उत्कृष्ट प्रशिक्षकलाई नगद ८ हजार १ सय ७२ का साथ ट्रफी र मेडल प्रदान गरिने छ ।
प्रतियोगितामा अत्तिरिक्त खेलतर्फ पुरुष भलिबल, म्याराथन, पक्लुङ (छेलो हान्ने), लठ्ठा तान्ने, धनुकाँड हान्ने, हाँडी फुटाउने, तेक्वान्दो लगायतका खेलहरु समेत सञ्चालन हुनेछ ।













