माङसेबुङ/दुधे यूथ क्लब झापा आत्मानन्द गोल्ड कप २०८२ अन्तर्राष्ट्रिय फुटबल प्रतियोगिताको सेमिफाइनलमा प्रवेश गरेको छ ।
माङसेबुङ गाउँपालिका–५ स्थित आत्मानन्द रंगशालामा मंगलबार भएको खेलमा पाहुना टोली कञ्चनजंघा फुटबल क्लब सिलगुडी, भारतबिरुद्ध ७–२ गोलको सानदार जित निकाल्दै दुधे झापाले सेमीफाइनलमा स्थान पक्का गरेको हो ।
दुधे झापाको जितमा निमा तामाङ र प्रदीप बुढाथोकीले ह्याट्रिक गरे । सञ्जोग मगरले एक गोल गरे । यस्तै सिलगुडी भारतका लागि पुजन सुब्बा र अभिषेक ठकुरीले एक–एक गोल फर्काए । खेलको मेन अफ दी म्याच दुधे झापाका निमा तामाङ घोषित भए ।
खेलको १३ औं मिनेटमा प्रदिप बुढाथोकीले गोल गर्दै दुधेलाई सुरुवाती अग्रता दिलाए । त्यसपछि खेलको २३ औं मिनेटमा प्रदिपले व्यक्तिगत दोस्रो गोल गर्दै टिमको अग्रता दोब्बर बनाए । खेलको २७ औं मिनेटमा निमा तामाङले गोल गर्दै दुधेलाई ३–० को अग्रतामा पुर्याए । यस्तै खेलको ३४ औं मिनेटमा निमाले व्यक्तिगत दोस्रो गोल गर्दै टिमलाई ४–० मा पुर्याए ।
पहिलो हाफमा ४–० ले पछि परेको पाहुना टोली सिलगुडीले दोस्रो हाफमा भने सुधारिएको खेल पस्केका थिए । यद्दपी दुधेको आक्रमक टोलीबिरुद्ध सिलगुडीको रक्षा पंती कम्जोर सावित भए । खेलको ५५ ओं मिनेटमा दुधेका निमा तामाङले ह्याट्रिक पुरा गरे । त्यतिबेला ५–० को अग्रता बनाएको झापाका लागि खेलको ५९ औं मिनेटमा प्रदीप बुढाथोकीले ह्याट्रिक पुरा गरे ।
पाहुना टोली ६–० ले पछि परेको अवस्थामा खेलको ६१ औं मिनेटमा पुजन सुब्बाले गोल गर्दै सिलगुडीलाई ६–१ मा फर्काएका थिए । यस्तै खेलको ६४ औं मिनेटमा दुधेका संजोग मगरले गोल गर्दै टिमलाई ७–१ को अवस्थामा पुर्याए । खेलको अन्त्यतिर ७६ औं मिनेटमा सिलगुडीका अभिषेक ठकुरीले गोल गर्दै खेल ७–२ को अवस्थामा फर्काए पनि हार भने टार्न सकेन ।
यसैगरी भोलि बुधबार दमक भाङबारी स्पोर्टिङ क्लब झापा र आयोजक यूथ अफ माङसेबुङबीच प्रतिस्पर्धा हुने खेलकुद विभाग संयोजक आत्म पवित्र खेलकुद समितिका अध्यक्ष मनप्रसाद आङबुहाङले जानकारी दिए ।
विश्व शान्ति र मानव एकताका निम्ति फुटबल भन्ने नाराका साथ मुहिङगुम अङसीमाङ लिङ्देन आत्मानन्द सेइङज्यूको ७२ औं जन्मोत्सव तथा मुहिङगुम अङसीमामाङ साँबा पवित्रहाङमा लिङ्देनज्यू नुमाङगेन्ना सेवा तथा चेसोक तङनाम महासमारोह २०८२ को अवसरमा आयोजित प्रतियोगिताको फाइनल खेल मंसिर १७ गते हुनेछ ।
मुहिङगुम अङसीमाङ लिङदेन आत्मानन्द सेइङज्यूको ७१ औं शुभ जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नुमाङगेन्ना सेवा एंव चेसोक तङनाम महासमारोहको आयोजना र आत्मापवित्र खेलकुद समितिको संयोजनमा आत्मानन्द गोल्डकप सञ्चालन हुने छ । भने, युथ अफ माङसेबुङले सह–संयोजनको भूमिका निर्वाह गर्ने जनाइएको छ ।
प्रतियोगिताको विजेताले ट्रफीसहित नगद ३ लाख ११ हजार १ सय ७२, मेडल र प्रमाणपत्र पाउने छन् भने उपविजेताले ट्रफीसहित नगद २ लाख ११ हजार १ सय ७२, मेडल र प्रमाणपत्र पाउने छन् ।
यस्तै सर्वाधिक गोलकर्ता, उत्कृष्ट गोल रक्षक, उत्कृष्ट खेलाडी, उत्कृष्ट डिफेण्डर, उत्कृष्ट स्ट्राइगर, उत्कृष्ट मिडफिल्डर, उदयमान खेलाडी, अनुशासित खेलाडी र उत्कृष्ट प्रशिक्षकलाई नगद ८ हजार १ सय ७२ का साथ ट्रफी र मेडल प्रदान गरिने छ ।
प्रतियोगितामा अत्तिरिक्त खेलतर्फ पुरुष भलिबल, म्याराथन, पक्लुङ (छेलो हान्ने), लठ्ठा तान्ने, धनुकाँड हान्ने, हाँडी फुटाउने, तेक्वान्दो लगायतका खेलहरु समेत संचालन हुनेछ ।
